TƏHLİL

Yaş və işlədiyi vəzifədən asılı olmayaraq günümüzdə demək olar ki, hər kəs sosial mediadan aktiv istifadə edir. Bunlara Facebook, Twitter, Instagram kimi digər sosial şəbəkələri misal göstərə bilərik.

Bəs Azərbaycanda istifadəçilər  Twitter sosial şəbəkəsindən nə dərəcədə effektiv istifadə edə bilir?

Xeberler.az saytı bunu aydınlaşdırmaq üçün Hacızadə Group-un baş direktoru Əli Hacızadə ilə söhbət apardı.

Əli Hacızadə öncə Twitter-in Azərbaycan seqmentinin trendlərini, (günün qaynar mövzuları) istifadəçilərin reytinqini, aktivliyini, Azərbaycan seqmentində gün ərzində ən çox paylaşılan video və fotolarını müəyyən edən  Aztwi.com saytı haqqında məlumat verib. “Aztwi-ni 2010 – cu ildə bir qrup istedadlı azərbaycanlı proqramist yaradıb. Bu sayt unikal bir layihədir. 2013 – cü ilin may ayında sayt rəhbərlik etdiyim şirkətin bir hissəsi oldu”.
Digər sosial şəbəkələrdə olduğu kimi, bu şəbəkədə də istifadə məqsədlərinin müxtəlif olduğunu qeyd edən Əli Hacızadə qeyd edib ki, kimsə öz fikrini bildirmək üçün istifadə edə bilər, məsələn o öz Twitter hesabına bir növ şəxsi Hayd Parkı kimi baxır. Kimsə kommersiya məqsədi ilə, kimsə də tanışlıq məqsədi ilə istifadə edir. Bundan əlavə jurnalistlərin də bir çoxu aktiv Twitter istifadəçiləridir. Bunun da səbəbi bu sosial şəbəkədə haştaq sisteminin çox yaxşı işləməsi və operativ məlumat əldə etmək üçün şərait yaradmasıdır.

Əli Hacızadə Toptrend-lərin  necə seçilməsi barədə də məlumatlar verib. Qeyd edib ki, bu seçim Aztwi üçün işlənib hazırlanmış xüsusi sistem vasitəsilə həyata keçirilir. “Bu sistem avtomatlaşdırılıb və burada insan müdaxiləsi olmur. Seçim zamanı sistem əsasən “mention”ları nəzərə alır. Bəzən hər hansısa istifadəçi sistemin seçimindən narazı qalır və Aztwi-ni düzgün seçim etməməkdə, qərəzlilikdə ittiham edir, təhqirlər də nadir hal deyil. Amma demək olar ki, heç bir istifadəçi @aztwisupport hesabına yazıb, bu və ya digər seçimin nəyə əsasən edildiyini öyrənmək istəmir”.

 Əli Hacızadə bildirib ki, Twitter istifadəçiləri əsasən deməyə sözü olan və bu sözü 140 simvola sığıştırmağı bacaran insanlardır. Bu isə o qədər də asan deyil. Bizim insanlar isə hər şeyin asan yolunu arayır daim, buna görə Facebook daha populyardır, bundan əlavə bir çox istifadəçi sosial şəbəkələri tanışlıq məqsədi ilə istifadə etdiyindən Facebook onlara daha geniş imkanlar verir.  Onun sözlərinə görə, Azərbaycanda bunlar əsasən gənclər, tələbələr, şirkət işçiləridir. Onların bir çoxunu birləşdirən amil isə sözlərini deməyi bacarmalarıdır.

Hazırda siyasətçilər, rəsmi qurumlar, media qurumları, ekspertlər, məşhur müğənnilər və müxtəlif şirkətlər əhəmiyyətli  informasiyaların ictimaiyyətə çatdırılmasında “Twitter”dən effektiv istifadə edir.  Elə şirkətlər var ki, artıq “Twitter” üzrərindən istifadəçilərlə əlaqə qurub. Hər hansı problemli hadisə baş verən zaman istifadəçilər şikayət və təkliflərini şirkətin rəsmi twitter hesabına yazır və  şirkət dərhal bu yazıya öz  münasibətini bildirir. Bütün bunlardan əlavə qeyd etmək lazımdır ki, bu sosial şəbəkədən də vaxt öldürmək və tanışlıq məqsədi ilə istifadə edənlər də az deyil.  

Bəs Twitter istifadəçiləri sosial şəbəkədən nə məqsədlə istifadə edir?

Günay Nəbiyeva: “Twitter-dən  adətən fikrimi qısa cümlə ilə ifadə etmək üçün istifadə edirəm. Bəzən də ürəyimdə qalan cümlələr olur, onları yazıram, hansı ki, realda deyə bilmirəm. Sosial şəbəkədən gündə 8 saat  və hətta, daha çox istifadə edirəm desəm yeridir”.

İsmayıl Ramazanlı: “Twitterdən istifadə etməkdə xüsusi bir məqsədim yoxdur, istifadə etmə saatım isə gələn notificationlar-dan asılı olaraq dəyişir. Gündə maximum bir saat istifadə edirəm”.

Almaz İbrahimova: “Twiterdən xatirə dəftəri kimi istifadə edirəm.Son yazdlqlarımı oxumuram , gözləyirəm üstündən aylar keçsin oxuyacam. Sosial şəbəkəyə mütəmadi olaraq baxıram. Gün ərzində 1 saatdan çox ola bilir”

Sevinc Çəltikova:  “Twitterdən gün ərzində 7-8saat istifadə edirəm. Əsasən,gündəlik marağımı cəlb edən hadisələrdən  danışıram”.

Nicat Məmmədov: “Burada rahatlıqla nə istəyirəm yaza və paylaşa bilirəm. Çünki burada, məni tanıyan adam azdır  ya da yox dərəcəsindədir. Gündə 2 ya da 3 dəfə istifadə edirəm. Məncə,buradakı insanlar digər sosial şəbəkə iistifadəçilərindən daha üstündür”.

Ölkəmizdə Twitter istifadəçilərinin sayı artma istiqamətində gedir və hazırda istifadəçi sayı 200  minə yaxınlaşır. Lakin istifadəçilər bir qismi aktiv deyil , belə ki onlar qediyyatdan keçib bir iki cəhd etdikdən sonra şəbəkəni tərk edirlər.

 Jalə Şahinqızı